Manifiestu

Por una marea del cambéu,
por un Podemos en movimientu.

Los dos últimos años foron frenéticos. De magar irrumpió Podemos nes elecciones europees, tuviemos somorguiaos nun procesu electoral tres d’otru, tanto internamente como compitiendo a nivel institucional. El movimientu pol cambéu axuntó munches posiciones, llevando voces distintes a los parllamentos y gobernando en munches ciudaes del Estáu. Sicasí, nun fomos quién a desapolinar al PP del gobiernu central y agora ye’l momentu d’empezar una etapa nueva.

Ye’l momentu de construyir sólidamente per embaxo, d’avanzar na construcción d’un partíu-movimientu confederalizáu, que respete y alimente l’autonomía de los movimientos reforzando los nuestros aciertos y corrixendo los defectos qu’arrastremos. Ye’l momentu de ser oposición a les polítiques neolliberales de la que construyimos contrapoderes nos barrios, nos centros de trabayu, nes universidaes y institutos, nes places. Ye’l momentu de convertir la política qu’apuesta pola tresformación social en daqué cotidiano. Ye’l momentu de construyir un programa alternativu y d’urxencia frente a les polítiques d’austeridá y la crisis climática. Llegó tamién el momentu de preparanos meyor y con más anclaxe social pa poder ganar, pa que cuando ganemos les elecciones haya un pueblu auto-organizáu que pueda desobedecer les llendes de la Unión Europea y los poderes económicos, pa poder ganar xusticia social, de xéneru, ecolóxica, de reconocencia efectiva de la plurinacionalidá. Ganar aprendiendo de les “llecciones de Grecia”. Ganar conquistando la democracia frente a la dictadura de los mercaos y de la deuda.

Paeznos que nes lluches pequeñes y nes grandes movilizaciones, na nuestra capacidá de facer coses distintes un día tres d’otru, ta’l niciu d’un horizonte constituyente, nel que puedan rompese los candaos del réxime del 78. Precisamos esa fuercia social pa poder poner la economía al serviciu de la xente, pa poder aplicar un programa fuerte que nun xestione lo posible, sinón qu’asuma qu’hai que camudalo too pa que nada siga igual.

Pa eso ye menester un cambéu de rumbu. Precisamos construyir un movimientu popular, ampliu, onde quepa y sía protagonista la xente trabayador, los que viven la precariedá, les muyeres, les persones moces, les qu’espurren la pensión mes a mes, el colectivu LGTBI… una multitú que desborde, que dende munchos flancos vaiga construyendo lo nuevo. Nun precisamos más partíos zarraos, más aparatos, más notables: precisamos más xente del común faciendo política, construyendo’l conflictu social contra les élites. Por supuestu, precisamos construyir la unidá popular con toes aquelles persones y colectivos, que, vengan d’onde vengan, tienen la democracia y la xusticia social como oxetivos. Una unidá popular pa poner en marcha una revolución democrática capaz a poner los intereses de la mayoría social trabayadora primero de nada. Precisamos siguir alimentando la revolución democrática qu’entamaron les CUP fortaleciendo l’apueste municipalista, trabayando por una institucionalidá nueva al serviciu de la ciudadanía

Precisamos discutir, debater, ponenos d’alcuerdu, facer propuestes. Podemos foi una ferramienta fundamental nesta fase qu’acaba y tien que siguir siéndolo na qu’entra. Precisamos un Podemos democráticu, como’l que vinimos defendiendo yá dende Vistalegre, onde’l poder surda de les bases y non de los cargos públicos y d’estructures verticalizaes, onde’l centru se construya dende los territorios, qu’almita d’una vez por toes el pluralismu asumiendo sistemes d’elección interna como la Borda, que combata los riesgos de la burocratización tasando los cargos que pue ostentar una persona. Precisamos construyir un podemos feminista qu’integre l’axenda y les práctiques feministes nel día a día, que lluche contra les espresiones del machismu y el patriarcáu en tolos ámbitos de la sociedá.

Por too esto, precisamos una Asamblea estatal de Podemos que mire pa fuera, qu’encare los debates que tenemos pendientes de forma franca, ensin sectarismos nin maniqueísmos. Un debate real que nos dexe repensanos, espardenos y conectanos cola gana de cambéu de los millones de persones que nos votaron y coles qu’entá nun lo fixeron.

Por eso, esti 10 d’avientu vamos llanzar un procesu abiertu p’ayudar a que Podemos s’asemeye más al Podemos que precisen les clases populares. ¿Anímeste a participar?

X